中環耳目：鄭志剛低碳餐單撐環保
新世界集團第三代接班人鄭志剛（Adrian）一向緊貼潮流，又創意無限，佢對環保都好有心，新世界旗下四間酒店同埋會景餐廳，最近陸續推出風味獨特嘅低碳餐單，正係Adrian嘅主意。
咪睇Adrian含住金匙出世就一定大魚大肉，其實佢平時鍾意食清淡嘅嘢。
低碳飲食未必等於食素，好似萬麗海景酒店「食得有良心」低碳餐，主菜有蒸本地海蝦、烚嘉美雞胸同埋金菇牛肉卷可選擇，符合就地選用食材嘅環保原則。飯後再來一客法式全麥薄餅配燴草莓，更加令人身心滿足啦！
低碳飲食只係Adrian響應環保嘅節目之一，由聽日開始為期一星期嘅「新世界綠色周」，各種創意活動接踵而至，包括員工着綠色衫返工、過綠色生日會，又會獲派有機生果，一句講晒，Adrian要大家對綠色生活有深刻體驗。
卓妮