中環出更：利子厚搞奧馬避過金融海嘯
利氏家族後人、希慎興業非執行董事利子厚（Michael）自幼與馬匹結緣，玩馬術幾十年，○六年獲選為馬會董事，其後更擔任○八年奧運組委馬術委員會成員，推動馬術運動。Michael因為埋首奧馬工作，因而推遲與友人合作搞投資公司，幸運地避過金融海嘯一劫，仲有資金趁低吸納添！
世事看似好奇妙，但Michael學習騎馬以至馬術就絕無僥倖。佢四歲首次跟爸爸利榮達到南區巴黎農場（海洋公園現址）騎馬仔，點知一騎就上癮，自此愛上騎馬，就算長大後到美國讀大學亦無間斷，期間贏過不少馬術比賽，亦因為意外帶來多處傷患，最嚴重試過傷至手部骨裂，但Michael搞笑話：「養馬蝕錢先至重傷呀！」
騎馬提高忍耐力
不過，馬術卻為Michael帶來無窮樂趣，不但可以為平日工作減壓，訓練馬匹更有助鍛煉個人忍耐力，因為馬術每個細微動作都要與馬匹配合及溝通，達致人馬合一境界，提高個人忍耐力對公司及同事都有好大幫助，他笑稱：「馬匹都忍到，人又點會忍唔到呢？」所以佢甚少向下屬發脾氣。
Michael目前擔任香港馬術總會副主席外，仲係馬會粉嶺會所主席，卓妮早幾日到粉嶺會所參觀Michael練馬，見佢策騎馬匹技巧相當純熟，跨完一個欄又一個欄，絕不簡單，但佢話跨欄唔算難，最難係盛裝舞步之中的原地踏步，因為要求馬匹臀部肌肉要好，所以唔係每匹馬都做得到。
卓妮見Michael一手一腳安裝馬鞍、韁繩及幫馬匹包裹護足布，仲親自帶領馬匹到戶外，愛馬程度不言而喻。
卓妮