政情：梁美芬又抽老鼠油水
中環鬧市早前嘅老鼠咬傷女遊客事件，鬧到全城熱烘烘。工聯會議員王國興尋日就批評，政府完全冇部門同各區區議會交代番地區衞生情況，搞到鼠患日生，仲令到滅鼠有功嘅梁美芬一炮而紅添。王國興咁講，擺明鬧政府無能，令鼠王芬可以「借鼠上位」啫，變相擺梁美芬上枱。殊不知梁美芬會錯意，以為王國興真係讚佢，仲趁中環單鼠患，乘機借老鼠撈番筆油水，真係唔到你唔服！
梁美芬見王國興點名「讚」佢，似乎感覺良好，到佢發言時，仲洋洋自得咁話，自己都係亂打亂撞先做到鼠王芬，正打算洗甩花名之時，中環又再出現老鼠，忍唔住要加句聲跟進吓。
梁美芬話根據佢之前處理油尖旺鼠患嘅經驗，老鼠繁生係因為政府官僚作風同整體公共衞生政策有問題，先搞到依家「老鼠也移民」，先由旺角去觀塘，再行隧道去埋中環，仲話依家仲有咁多老鼠橫行，覺得好諷刺喎。梁美芬講就講到好嫌惡老鼠咁，但其實佢應該多謝班老鼠囉，唔係又點會有人叫佢鼠王芬呢？