政情：陳淑玲冧莊掌品牌局
香港品牌發展局換屆，長江製衣董事陳淑玲冧莊，繼續執掌品牌局，三名副主席係工業界人士倪錦輝、黃家和同李惠中。品牌局搞「Top嘜」品牌選舉，喺業界有相當地位，陳淑玲冧莊執掌品牌局，反映佢有番咁上下江湖地位，有佢父親、人稱「球伯」嘅陳瑞球之強人本色。
品牌局五年前由現任廠商會會長黃友嘉推動成立，到依家已經第三屆，前會長尹德勝擔任過第一屆理事會主席，然後陳淑玲接棒，一做至今，新一屆任期由今年四月開始，至一二年三月底。廠商會尋日嘅新聞稿讚揚陳淑玲任內大力提升品牌局嘅影響力，擴闊會員基礎，為會務發展奠下良好基礎。
品牌局搞唔少活動，較知名嘅有「香港名牌選舉」同「香港服務名牌選舉」，唔少同行透過呢兩個選舉打出名堂。陳淑玲冧莊執掌品牌局，證明佢嘅江湖地位不容小覷，事關佢父親係工業界元老「球伯」，堂兄係全國政協常委陳永棋，自然多人畀面。