政情：李少光唔記得「起錨」
煲呔曾近排醉心「起錨」搞政改，成班下屬惟有撐到底。猶記得上周末「起錨」首日，成班司局長戴住個起錨襟章，舉起手高呼起錨，場面何其壯觀。不過話晒戴襟章唔同打呔，唔記得戴一啲都唔出奇，保安局局長李少光尋日就一度甩轆唔記得「起錨」。
煲呔曾講明全速起錨，成班問責高官近排出巡點都唔少得戴襟章同呼籲大家齊起錨，無論個場合同政改幾咁風馬牛不相及，例牌動作唔少得。不過光哥近排可能畀「民主女神像」風波搞到一頭煙，尋日出席一個建築、電氣、保安展時，預先寫好嘅講詞明明大半係講政改，但致辭前去巡場時仍係老西一套，巡咗成大半個鐘，個襟章都唔知去咗邊。唔知係咪睇稿時終於醒起，光哥上台時個襟章終於神奇再現，重新起錨！
同場嘅發展局局長林鄭月娥就冇老貓燒鬚，晨早着咗套深色套裝，襯番個襟章，火速起錨。不過娥姐致詞時就冇光哥咁「硬銷」，只係臨尾向啲外國賓客解釋點解要戴襟章，又話現時係關鍵時刻，呼籲各界起錨。相對光哥將成個政改方案再講一次，林鄭月娥局長嘅版本易明好多。