政情：大輝時裝騷方剛談心得
從事紡織業起家嘅立法會廠商會代表林大輝，近年將時裝設計帶入其創辦嘅林大輝中學，每年搞一次時裝創作匯演。今年匯演喺上周三舉行，以「擁抱夢想」為題，手執Jessica、Episode及Toppy三張時裝王牌嘅立法會議員方剛，到場與學生分享時裝設計經驗，話設計意念天馬行空唔難，將設計落實同賣到錢最難。
除咗方剛外，廠商會副會長施榮懷、進出口界黃定光、勞工界葉偉明、保險界陳健波、民主黨黃成智及着衫靚靚嘅沙田區議員龐愛蘭（Scarlett），都老遠去沙田捧場。Scarlett着住米黃色紡紗衫褲好飄逸，成個女神咁款，佢話套衫首次着出街，咁現場男士咪好有眼福？
設計最緊要賣錢
作為時裝界老行尊嘅方剛，一直關注理大學生嘅時裝設計，覺得學生好有潛質，但佢提醒學生，時裝設計意念即使天馬行空，都要將設計落實、賣到錢至得。記得方剛去年出席個時裝騷時，都嫌啲衫款式太超乎現實，擔心着唔到出街。方剛又話，潘宗光在任理大校長時，佢都提議潘校長讓時裝設計畢業生到外國著名時裝品牌實習，有冇落實就唔知喇。
大輝近年不斷喺學校、政圈及球壇之間穿梭，尋日又撰文大談選舉委員會嘅組成，建議將政府提議五十一個分畀政協委員嘅議席畀晒民選區議員，令區議員有更大嘅參政空間。如果大輝籌組嘅「C18」地區聯盟成員入到選委會，聲勢真係唔講得笑架！