政情：政改大戰余若薇搵人抬轎

敲定６月17日下午舉行

煲呔曾同余若薇嘅政改辯論戰，未真正埋牙已先拗一輪，為具體安排爭持多日，尋日雙方終於達成初步共識，公民黨提出嘅要求，好似提前辯論同加入現場觀眾咁，全部落空，雙方敲定如期六月十七日下午六點三十五分至七點半舉行，戰場喺中區政府合署，搵資深傳媒人吳明林做主持。特首辦只作一個小讓步，就係容許事先收集市民書面或錄音提問，由二人即場抽籤回答，臨場考急才。

大戰在即，余若薇尋日大談戰前準備，話唔使做面部深層護膚，亦無請人訓練，只係搵公民黨秘書長陳家洛扮煲呔曾，作模擬辯論，就係咁多。不過，政界流傳，余若薇嘅戰前部署，唔止咁簡單，消息話，呢次辯論關乎政改方案正反陣營對決，余若薇收到煲呔曾封戰書之後，即刻打咗三個電話，分別係李柱銘、陳方安生同張健利，請教意見，好似係咪應該應戰？係咪應該要求加入現場觀眾等等？聽過三人教路，就安心回覆煲呔曾，一決雌雄。

余若薇曾經公開表示，就辯論一事問過民主黨主席何俊仁等其他民主黨派意見。消息話，何俊仁等人嘅意見，只屬次要，真正主導余若薇決定嘅人，肯定係李柱銘等以上三人，亦即係話，佢哋喺呢場辯論大戰嘅角色，就係余若薇嘅最高智囊三人組，如果最終能夠打低煲呔曾、拉倒政改方案，三人背後有發功。

李柱銘、陳方安生同「淫賤黎」黎智英，一向鍾意喺政壇搞幕後操控，興波作浪，呢個搞事組合，每逢香港有重大政治事件，都喺幕後發功，司馬昭之心，路人皆知，尤其有「香港李登輝」外號嘅李柱銘，身為民主黨創黨主席嘅佢，近年每到關鍵時刻，必明撐暗扶公民黨，甚至不惜「賣黨」，多次為助公民黨而犧牲民主黨，今次暗助余若薇撼煲呔曾，絕對唔出奇，只係，陳方安生突蒙喪夫之痛，相信余若薇情商助拳一事，應該會就此作罷，餘下李柱銘同張健利繼續發功。

我哋尋日問余若薇就辯論搵「三人組」教路一事，佢無否認聯絡過三人，話之前傾咗好多嘢，但傾乜都無意思，事關都未知煲呔曾會如何出招，又話如果三人有好意見，即使唔搵上門，佢哋都會主動相告咁話。呢句最真！大家且看煲呔曾同余若薇嘅辯論能否擦出火花。