中環出更：蔡志明豪氣 名錶贈曾寶寶
喺鐘錶界走在最前嘅英皇鐘錶珠寶，尋日為鐘錶愛好者舉行「百達翡麗」（Patek Philippe）新錶預展，喺尖沙咀半島酒店筵開五席，邀請約五十名貴賓出席，包括玩具大王蔡志明、前國家副主席曾慶紅姪女曾寶寶、賭王何鴻燊四太梁安琪、澳門賽馬會董事總經理李志強及全國政協常委何柱國等，衣香鬢影，蔡志明更即場訂購一隻廿萬元名錶贈知音。
「我送畀你，入我數！」
獲蔡志明送贈名錶嘅係身家達七十億港元、花樣年控股集團創辦人兼執行董事曾寶寶。卓妮見曾小姐對百達翡麗各款名錶好有興趣，與友人走到不同飾櫃觀看。
期間蔡老闆向曾小姐推介一隻價值約廿萬元嘅手動女裝錶，職員隨即取出名錶讓曾小姐試戴，戴唔夠十秒，蔡老闆好豪氣話：「幾好吖！訂啦，我送畀你，入我數！」
蔡老闆送贈嘅百達翡麗名錶為4958G系列，錶帶為絹面，配以18K白金錶殼，名貴之中帶點含蓄，難怪女士們愛不釋手。蔡老闆名錶贈知音，其實本身都係愛錶之人。原來佢一向有收藏名錶習慣，屋企和寫字樓收藏近二百隻名錶，包括江詩丹頓、愛彼錶、勞力士及三隻百達翡麗名錶。
蔡老闆話，佢收藏嘅其中一隻百達翡麗為7010系列，喺二十年前以十五萬元購買，至今真係唔知升值咗幾多，現在珍而重之放喺錶盒內，得閒攞出來欣賞吓，不知幾過癮！問蔡老闆有否打算買多幾隻百達翡麗名錶送畀家人？蔡老闆就話：「個女叫我唔好買咁多喎，因為佢哋實在太多名錶喇！」
卓妮