中環出更：楊受成為百達翡麗省招牌
有手錶界勞斯萊斯之稱嘅百達翡麗（Patek Philippe）（簡稱PP），每次出新錶均異常矚目。今年新鮮出爐嘅PP腕錶，尋日登陸香港。由英皇集團主席楊受成旗下嘅英皇鐘錶珠寶，率先展示畀城中富商名流欣賞。PP產量矜貴，一錶難求，有得先睹為快，絕對係身份象徵。楊受成榮登尋晚嘅「PP王」，手上戴着抵港不到兩星期、價值逾一百六十萬嘅PP名錶，閃爆全場！
靚錶升值逾百萬
英皇係PP錶喺香港最大嘅零售商，彼此合作超過四十年，PP出新錶，英皇當然快人一步攞到靚錶。楊受成尋晚戴住嗰隻「5971PT」款式，原來預訂咗幾年，個幾星期前終於抵港。呢款錶前年面世，如今錶價已升值至三百萬；即係話，楊生一戴呢隻錶已淨袋逾百萬，認真Lucky。
PP錶升值潛力驚人，楊生一於醒埋老友，今年三月出席瑞士巴塞爾世界鐘錶珠寶展時，率先訂咗隻最新款嘅「5396G」手錶送畀新世界發展主席鄭裕彤，隻錶月前抵港，彤叔已經戴緊嘞。楊生話，呢隻錶款式典雅，啱晒彤叔年紀。卓妮仲八到，「5396G」係白金錶殼，配上鱷魚皮錶帶，盛惠三十二萬銀，暫時全港只得彤叔一隻。
PP冧盡男女老幼，楊生千金兼英皇鐘錶珠寶董事總經理楊諾思（Cindy）都畀PP迷住，尋日親自到場招呼貴賓。Cindy話，家中珍藏咗六隻PP，近年更愛上升值潛力更高嘅男裝PP錶。Cindy尋日揀嚟一款價值逾二十萬、鑲滿鑽石嘅PP女裝錶亮相，盡顯貴氣。
不過靚錶無人嫌多嘅，Cindy對場內展出嘅新系列PP錶心思思。原來佢睇中一款屬PP首隻女裝計時秒錶「7071R」，價值六十一萬一千蚊。卓妮問Cindy，到底PP錶有幾受歡迎？佢坦言好多貴客月前喺PP官方網頁上睇到有新錶推出，拿拿臨打去英皇搶先訂錶，皆因唔少熱門款式產量有限，手快有、手慢無。
卓妮仲留意到，楊生太太陸小曼都戴住PP錶，不過已經戴咗十幾年；睇真啲，錶身鑲滿珍貴綠寶石，散發耀眼光芒。楊受成細仔楊政龍都有現身晚宴，佢謙稱未儲夠錢買PP，平日愛戴已故爺爺留下嘅白金勞力士手錶，因為好有紀念價值，而PP佢就會攞爸爸嘅嚟戴。
卓妮