政情：副局政助中環打游擊
煲呔曾為政改搞「起錨」騷，總動員全體高薪厚職嘅司局長落區派單張不特止，副局政助都走唔甩，點知上周六首度出擊就被喝倒采，又被批安排不善，更畀「八十後」連番狙擊。我哋尋日路經中環，撞見財經事務及庫務局副局長梁鳳儀同勞工及福利局政治助理莫宜端變身「阿四」派單張，旁邊仲有另一位男士，組成「單張三人組」，實行改變策略，化整為零，打游擊派傳單。
黃昏六點，中環人行色匆匆，歸心似箭，話知你有米派都未必攞。梁鳳儀唔理咁多，與一身白領儷人look嘅莫宜端企喺太子大廈對出港鐵站，見人就派單張或襟章，但肯接單張者只係一半一半，三人派咗半粒鐘就停手。
莫宜端話，今次係自己第一次喺中環派宣傳政改單張，選擇喺呢區打游擊，主要因為喺呢區多寫字樓，行政人員較多，所以選擇放工時間嚟派傳單，希望佢哋多啲了解政改諮詢方案。好在維園阿哥事前收唔到風，冇過去踩場。