政情：總商會改選肥胡順利坐正
原本波濤暗湧嘅香港總商會新一屆主席選舉，尋日終於由呼聲最高嘅原常務副主席、醫管局主席胡定旭當選，港鐵行政總裁周松崗就接棒做常務副主席，副主席有三位，分別為中銀香港副董事長和廣北、長實副主席李澤鉅及怡和董事彭耀佳。理事會原擬以半小時開會選出新一屆正副主席，最後唔使一分鐘搞掂，近排好低調嘅肥胡，贏得輕鬆漂亮！選舉咁順利，另一原因係反對勢力缺席，特別係盛傳賽前有意「倒胡」嘅總商會前主席、現任理事田北俊缺席，個會至咁平靜。
田少缺席棄投票權
香港總商會係本港四大商會龍頭，尋日傍晚五時許，商界重量級代表陸續入場，好似「小超人」李澤鉅、新地副主席郭炳聯、周松崗、招商局主席傅育寧、機場管理局行政總裁許漢忠、總商會立法會代表林健鋒等。肥胡入場時話一啲都唔緊張，好似坐定粒六。
上屆嘗試支持兩名自己友進身理事會失敗嘅田少，今年冇推代表競逐，尋日連理事會都唔嚟，索性棄權，難怪選舉後問肥胡得票率時，佢忍唔住開懷大笑，現場得票率係百分百！肥胡滿腹大計，話今年總商會踏入一百五十周年，首先會反思過去做咗乜嘢，又諗緊將來多啲為商界、會員同香港服務。
