政情：6．23政改決戰事在必行

立法會尋日開政改小組會，多名議員向政制及內地事務局局長林瑞麟逼供，要求交出表決政改方案時間表。林D9半滴口風都唔漏，重申七月中立會暑假休會前提交方案表決，具體日子未定。林D9呢句話，一半真一半假啦，事關自從6‧23消息曝光，港府的確一直研究改日子嘅可行性，絞盡腦汁，聽聞至今仍未死心。不過，港府高層心裏早打定輸數，硬住頭皮喺6‧23表決方案嘅機會已經高達九成九。

眾所周知，政府睇中6‧23，目的為避「七一」呢個敏感日子，因為若喺「七一」後嘅兩個星期三，向立會提交方案表決，變相協助泛民谷高「七一」遊行人數。如果政府棄用6‧23，又有乜日子可揀呢？後一個星期三即六月三十日，正值「七一」前夕，風頭火勢，港府評估，表決政改隨時玩兩至三日，即橫跨「七一」，自然博唔過。提早一個星期三又點呀？可能個天都唔鍾意煲呔曾，六月十六日撞正端午節紅日假期，立法會休息。咁不如再早一個星期三、即六月九日呢，可惜，時間太倉卒，已經無法符合必須提早十二個工作天向立法會秘書處作「預告」嘅規定嘞。

據聞周末又有新搞作

所以，據聞特區政府雖未最後拍板，但似乎已無得揀，6‧23政改方案生死戰勢所難免。煲呔曾政府會盡量利用最後呢三個星期，為政改方案爭取支持作最後衝刺，上星期六煲呔曾率領全體問責團隊上演「政改起錨」騷後，據聞今個周末，煲呔曾團隊又有新搞作，攻勢會唔會好似「起錨」騷咁，畀市民彈到飛起，以死火拋錨結終，大家拭目以待。