中環耳目：林健鋒上會所歎順德名菜
私房菜曾經流行一時，查實「會所菜」更有特色。藏身於中環租庇利街一幢大廈內嘅「順德聯誼總會」，以精緻小菜聞名，唔使多賣廣告，食客聞風而至，「經濟動力」嘅林健鋒（Jeffrey）、梁劉柔芬（蘇菲梁）同梁君彥都經常幫襯。
最愛鎮店炸魚嘴
順德係魚米之鄉，河鮮最著名。Jeffrey最愛鎮店招牌菜「炸魚嘴」，大廚用上多個鯇魚嘴沾上麵粉炸至香脆，但魚唇肉嫩滑無比。
再嚟係「豉油皇煎大蝦」，蝦隻夠大，蝦膏豐富。咪睇小呢味餸，用油泡鮮蝦講功夫，泡得唔好蝦味會流失；秘訣係用猛油將蝦快速走油，蝦殼被炸至金黃，但蝦肉仍然鮮嫩，吸收晒豉油精華後，爽口彈牙，鮮甜多汁。
歎完濃味菜式，轉吓口味，叫一碟清新嘅「蝦子柚皮」：呢款菜坊間已少見，大廚以上湯「餵」柚皮達半粒鐘，再加上湯煮柚皮，入口鬆化不帶澀味，用白菜墊底，白菜吸晒柚皮精華。歎咗幾道順德風味菜後，Jeffrey仍嫌未夠喉，佢話唔少傳統順德菜已失傳，好似蒸蠶蟲咁，可惜喺香港已經食唔到嘞！
卓妮