中環出更：田二少睇靚錶嫌貴扁嘴
話晒都做時裝，人稱二少嘅G2000老闆田北辰幾時都要緊握最新潮流資訊，所以一得閒就去行街街。好似早幾日就見佢同老婆一齊去勞力士專門店睇名錶，不過望住兩隻都係一樣咁閃嘅靚錶，魚與熊掌都唔知點揀好，難怪佢試到嘴扁扁都扑唔到錘，不過二少就解釋唔買係因為四萬幾蚊太貴唔抵買，投資喺仔女同員工身上先會不惜工本，真係估唔到二少原來咁慳自己。
有選擇有時都幾麻煩。早幾日卓妮去行街街，見到田二少同太太喺勞力士專門店入面，店員攞咗兩隻鋼錶畀二少揀，二少攞住兩隻錶比嚟比去，戴上手睇吓又除落嚟望，不時問老婆意見，二少仲睇到嘟起嘴鬼咁肉緊，不過左右手各握一錶嘅佢，睇咗半個鐘最後都係嘴扁扁扑唔到錘。
寧投資子女員工望回報
雖然買唔到嘢，不過二少行完個「大運」出嚟，心情都好好。二少話佢一向都係勞力士fans，貪佢鋼身夠輕巧，睇落夠平實。唔愛戴鑽錶同金錶嘅佢，手上嗰隻勞力士買咗差唔多十年，當年大約萬零蚊。田少話太太笑佢隻錶花晒，叫佢買過隻靚錶戴，咁啱行過錶行，所以先入去睇吓，點知攞上手先知，依家啲錶起晒價，隻隻都要四字頭先有交易。哦！原來嫌貴，怪唔之得二少睇到皺晒眉啦。
二少話佢投資喺子女教育同員工嘅培訓上會不惜工本，因為有回報，但錶只係戴喺手，佢又成日巡舖同返大陸，或者去山旮旯地方，平時見親都係平民百姓多。如果戴十幾萬嘅錶畀人搶咗會好肉刺，佢仲搞笑話︰「如果萬零蚊，你用支槍指住我，我咪隊畀你囉！」其實隻錶十年間由萬幾升值三、四倍到四萬幾，回報好過銀行收息啦！不過田少做大生意，佢個算盤都應該無打錯嘅。
卓妮