鐵頭仁與一向強調同政府「又傾又砌」嘅民協立法會議員馮檢基，尋日變咗難兄難弟，全場被「紅衫軍」圍攻，「維園阿哥」任亮憲舉牌，揶揄「民協又Eat又Take」，又批評白鴿黨放棄爭取二○一二年雙普選，唔屬於真正民主派，搞到鐵頭仁面燶燶。
身兼南區區議員嘅白鴿黨柴文瀚起身發言之餘，亦負起救「仁」職責，喺台下不停同任亮憲鬥嘴，意圖分散任嘅戰鬥力，而當其他「紅衫軍」柴鐵頭仁台時，另一鴿員馮煒光亦加入一齊斥罵維園阿哥，嚟一招「圍憲救仁」。
只係拳怕少壯，馮、柴畢竟屆「中鴿」之年，同班後生仔鬥大聲輸蝕晒，鐵頭仁同阿基始終難逃被圍攻命運。泛民學者黃碧雲見到咁嘅場面，都不禁開聲，勸雙方團結。