自由黨主席劉健儀（Miriam）予人女強人嘅感覺，但佢強得嚟其實都係一級慈母，為咗個仔，暫緩離婚，政途、休息時間乜都願意犧牲。
Miriam話當年為咗個仔，雖然婚姻失敗都一直忍耐，到個仔十三、四歲有足夠理解能力先正式離婚，覺得個仔太細個就要變單親家庭對佢唔公平，亦擔心佢會誤解父母離婚係自己嘅錯，有精神困擾甚至影響成長。
Miriam話早年無全身投入地區工作同黨務都係為咗個仔，等到○三年囝囝出國讀書先全情投入，皆因囝囝有學習障礙，佢要諗方法幫個仔讀書同應付公開試，有時出一斤力隨時一両嘅回報都攞唔到，好彩個仔都生性無放棄自己，前幾年個仔大學畢業，佢先至如釋重負。