政情：港政協遊世博成雙成對

港區政協委員組成嘅上海世博考察團，上周二啟程，話咁快就完成四日行程。今次考察係歷來最大規模，委員踴躍參加之餘，好多仲攜眷出席，成雙成對。好似前教統局局長李國章就拖到外籍愛妻實一實，結果有成百幾人浩蕩出發，佢哋今次仲考察咗洋山深水港。

由於政協考察團「人多勢眾」，據講正在江蘇視察嘅全國政協副主席鄭萬通，都專程到上海探望考察團，而考察團上周二抵達上海後，亦獲上海市委書記俞正聲接待。一眾團員分別參觀過中國、香港、英國、德國等展館，政協委員蔣麗芸話，中國館內嘅電子動態《清明上河圖》夠晒驚喜，而英國館嘅環保概念亦值得一讚。

不過身兼旅遊發展局主席嘅田北俊就話，上星期三佢哋獲得接待，好有效率咁一日遊覽咗五個館，第二日雖然都有門票，但就無時間排隊入館，於是提早一日返港。佢今日以旅發局主席身份再出發，去向六千五百萬名參觀世博嘅內地同胞推廣香港。