政情：煲呔曾起錨騷 網民叫「收皮」

煲呔曾政府施政落後形勢，但做騷裝點門面，就好追上潮流，將「起錨」騷搬上網絡國度，開Facebook群組，吸引青少年，係就係激起網海熱潮，但唔係支持政改，而係惡搞「起錨」風潮，繼有人創作咗「政改超錯」海報後，尋日喺網絡湧現嘅惡搞作品更如雨後春筍，好似將政府宣傳單張嘅「起錨」字樣，改成「起義」同「拋錨」，其中嘅「收皮」群組，仲大受網民歡迎，同「起錨」群組相映成趣。

網絡係現代人嘅另一個思想世界，到底煲呔曾呢場「起錨」騷應該繼續落去，定係及早收檔，睇吓Facebook嘅反應就知一二。「收皮」群組成立一日，已經徵集到超過四千個粉絲，網民反應熱烈，差唔多係煲呔曾「起錨」群組嘅四倍，呢個民情巨浪，可以話對煲呔曾嘅「起錨」騷一盆冷水兜頭淋。

被發現讀錯「錨」字

煲呔曾話要以「破格」方式推銷政改方案，但係一次衰過一次，早前推出兩條「造裙」同「跳舞」比喻政改嘅電視宣傳片，劣評如潮，後來以「信」同「行」字為主題嘅平面廣告，又被人批評太隱晦難明，依家再推出「政改起錨」騷，一樣被彈到遍體鱗傷。

坐足全程下落不明

尋日我哋上政府網「一站通」搵「起錨」宣傳片睇吓，發現留言板上嘅五十幾個網民留言，清一色鬧爆，想搵個人讚吓都無，連搵人上網造勢都唔識，煲呔曾嘅心戰室唔通畀人鬧到士氣消沉，已經死火拋錨？有人留言揶揄煲呔曾管治團隊已係爛船一隻：「起錨讓爛船沉沒，坐佢隻船肯定沉船，坐足全程下落不明。」其中一名網民仲非常心水清，話煲呔曾、「唐唐」唐英年同「鬍鬚曾」曾俊華都讀錯個「錨」字，話應讀naau4，即發鼻音，而唔係laau4，證明懶音唔係青少年嘅專利。