中環耳目：黃家榮巡舖順便打邊爐
近年急速擴充嘅稻香集團雖然分店數目急增，但係管理一啲都冇鬆懈，難怪成日周圍去搵食嘅恒隆地產主席陳啟宗都公開讚揚佢哋。
卓妮早前撞到稻香嘅第二大股東兼執行董事黃家榮（Steve），原來微服出巡係佢分內事，佢仲會趁巡舖時去醫肚，至愛係厚德商場嘅稻香超級漁港肥牛火鍋。
Steve話畀卓妮聽，佢始終鍾意食廣東菜，就算佢哋旗下已有多間唔同類型嘅主題食肆，但心中至愛都係稻香超級漁港，就算大熱天時都啱食，美國肥牛係必食之選。
Steve平時好少曝光，佢家族三代從事飲食業，曾經同父親一齊打理北角嘅稻香飯店。十九年前佢同拍檔兼集團主席鍾偉平合資開辦稻香火鍋海鮮酒家，鍾負責經營策略同埋開店，佢就負責管理和監察，包括巡舖。
新員工有眼不識泰山
佢笑謂近年新入職員工愈嚟愈多，巡舖時未必識佢，試過有次佢直行直入，知客姐姐叫停問佢：「有咩幫到你？」Steve笑謂：「你幫我搵多啲錢啦！」員工要醒定啲嘞！
卓妮