中環出更：食力簡硬撐英軍捧世盃

牙擦擦嘅冠軍練馬師簡炳墀尋日現身沙田馬場，打咗條金光閃閃嘅領呔非常搶眼，睇真啲原來上面印咗八年前日韓世界盃字樣，食正即將開鑼嘅南非世界盃熱潮。原來食力簡唔止係馬迷仲係球迷，八年前亞洲首次舉辦世界盃，佢就特登飛去現場睇波，順便買咗呢條呔留為紀念。

咁今屆世界盃食力簡又睇好邊隊呢？佢話早於一九六二年喺英國受訓時，已經係英超強隊阿仙奴嘅擁躉，經常揸車撲飛睇波，感受現場熱鬧氣氛，賭波都係賭英超，所以對陣中有阿仙奴星級球員嘅英格蘭情有獨鍾，今屆英格蘭人強馬壯，被各界捧為大熱之一，佢仲考慮會唔會飛去南非捧場添！

不過睇番英格蘭往績，自從一九六六年嗰屆捧盃之後一直都未試過攞冠軍，一向牙擦嘅食力簡無得威威咪好失望？佢就話踢波呢家嘢有時真係好難講，始終波係圓㗎，希望英格蘭今屆會有好表現啦！

卓妮