中環出更：超雲型格打扮展魅力
蜜運中嘅女人特別靚，賭王何鴻燊千金何超雲自從拍拖後，衣着打扮漸有個人風格。上周五晏晝五點，穿上束腳牛仔褲、手挽逾萬銀Celine新手袋嘅超雲，現身中環力山大廈COVA歎下午茶，引來唔少茶客注目。
男友王大業要返工，超雲身邊只有高貴auntie相陪。COVA嘅雪糕同蛋糕最得超雲歡心，不時買COVA蛋糕孝敬老竇，不過唔知係咪夏天到要keep fit，呢日佢清清哋飲杯茶，並冇食嘢。飲茶期間，超雲仲不時用手機發短訊，佢左手手腕上戴上十幾條閃石手鏈，潮爆。
歎茶四十五分鐘後，超雲起身走人，同女友人say goodbye後，佢原來約咗另一位男士，不過唔係超雲男友，對方衣着入時，兩人邊行邊講笑，身穿五吋交叉帶高跟鞋嘅超雲，更熟落地搭住對方膊頭行街街。
手挽Celine夏季新袋
卓妮上前同超雲打招呼，問佢幾時同男友拉埋天窗，超雲甜笑話：「未有咁快，點解個個都咁問嘅？」幸福盡在不言中。咁賭王返家休養後，近況點呢？超雲話：「Okay！」佢坦言暑期冇打算出門旅行，唔知係咪想多啲時間陪吓爸爸嘞。
超雲着衫一向係時尚指標，近日更獲雜誌封為「最時尚女性」，呢日佢率先以Celine黑色牛皮拼米色帆布luggage bag亮相。
呢款袋係Celine夏季得意之作，登陸香港只有個幾月，容量驚人，購物、去旅行啱晒。未等男友送贈，超雲就買嚟
自己開心。卓妮打聽到，呢個袋係購於置地Celine專門店，盛惠一萬八千五百元。
卓妮