中環出更：高官兩擺烏龍議員贏波
立法會議員餓波餓咗幾個月，尋日終於有飯開，下晝兩點半同高級官員踢咗場友誼波。咁難得，卓妮都去睇吓！幾乎喺同一時間，煲呔曾都落區出行力嗌「起錨」，肉緊到連頭髮亂埋都唔理。喺球場上班高官當然唔敢留力啦，不過都唔知應該話佢哋識做明送「秋波」畀班議員，還是出師不利，居然上下場都入烏龍波明醒立法會直接得分。
學政制及內地事務局局長林瑞麟尋日話齋，踢波最緊要唔好企喺度，要落場踢先有波入；如果大家跟住規則做，七年十年後就入咗兩球波。家吓高官確係入兩球，不過係入自己籠輸波呢！
高官要幫手派傳單，尋日落場踢嘅高官只有新任運輸及房屋局常秘（房屋）柏志高，同埋做咗北區民政專員嘅「小Donald」陳羿。議員隊方面，領隊有譚偉豪，隊員有高達李永達、陳克勤、梁家騮、長毛梁國雄同大舊陳偉業。
高達倒掛埋齋
啱啱畀中聯辦副主任李剛寸完唔知係幾品嘅梁國雄，棄用頭巾，改用紗布包頭，佢話自己不嬲都無品，譚偉豪就話睇佢哋落場，就知佢哋有無品。開波無耐，守龍門嘅陳克勤就畀高官隊中場一腳笠死咗，高官隊氣勢如虹，跟手又入籠，不過係入自己個籠。烏龍咗一次，點知下半場又嚟多次，連送兩球畀議員，臨完場前，李永達再嚟一個倒掛入埋，議員三比一贏波﹗
賽後檢討，之前同前高官葉澍堃打過乒乓波嘅譚偉豪忍唔住話︰「高人講得無錯，『唔出聲就民望高，唔失波就得分高』！政府呢個時候派傳單，想向我哋拉票，依家醒兩球畀我哋，可能遲啲世界足協都要跟進下，哈哈！」
卓妮