中環出更：食潮州甜品 陳健波憶童年
潮州菜有平有貴，豐儉由人，好似灣仔佳寧娜潮州菜，想食得豐富可以選鮑參翅肚、燕窩或響螺片，但亦都可以簡簡單單食一餐。卓妮最近發現身為潮州人、立法會「五散人」之一嘅保險界代表陳健波，平時都會到佳寧娜開餐，但佢食飯重點並非主食，而係飯後嘅潮州特色甜品，食食吓仲憶苦思甜，諗番童年由潮州坐船偷渡來港嘅艱苦歲月。
卓妮有日遇到「波哥」陳健波請客，睇吓佢張餐單，發現全部都係傳統潮州菜式，包括滷水鵝片豆腐、蝦丸拼蟹棗、水瓜煮魚蛋魚鰾、菜甫煎蛋、涼瓜鹹菜黃豆排骨煲及沙爹牛肉蠔仔炒河。波哥特別激讚「水瓜煮魚蛋魚鰾」啲魚鰾好入味，炆到夠晒腍，例牌不過係八十蚊。佳寧娜副總經理譚長鳳話，佢哋選用嘅魚鰾係巴西靚貨，走油後再用薑葱水浸腍，煮十幾分鐘就可以上碟。
剝皮食香芋條 甜味適中
波哥仲大讚「菜甫煎蛋」唔鹹唔淡，味道啱啱好，送潮州粥就認真一流。原來波哥屋企都有一大樽黑色嘅老菜甫看門口，得閒用嚟煎菜甫蛋或送潮州粥，相當滋味。主食之後，就輪到波哥最愛嘅重頭戲甜品，佢點咗至愛嘅反沙香芋條、羔燒五仁甜四寶及潮州油粿。
「羔燒五仁甜四寶」係潮州最傳統嘅甜品，「四寶」為銀杏、芋頭、番薯、南瓜，銀杏又叫福果，番薯代表金，芋頭代表銀，寓意有金又有銀，成為農曆新年好意頭嘅賀年食品。至於「反沙香芋條」，雖然卓妮食過好多次，但就未見過好似波哥咁除去芋條嘅沙糖外皮嚟食；波哥話，即使唔食沙糖外皮，沙糖甜味已滲入芋條，咁嘅食法反而無咁甜，味道恰到好處。
波哥食食吓家鄉菜，忽然憶起童年往事。佢話三歲（一九五七年）嗰陣跟阿媽由潮州汕頭坐船偷渡來港，點知畀人拉咗去拘留所，於是好慌張問阿媽點算好。阿媽就安慰波仔話：「下個禮拜再嚟過囉！」有人話捱過苦嘅人會更珍惜現在，唔怪得波哥為人刻苦勤奮、知慳識儉喇！
卓妮