引路徑亂擺貨靠害視障者
食物環境衞生署轄下熟食中心設置引路徑原為方便視障人士，惟因缺乏巡查反成陷阱！陳先生經常光顧牛頭角街市一樓熟食中心，發現不少檔戶將雜物放於行人路，令引路徑失去應有功能，「如果啲視障人士真係跟住條引路徑行，實會撞崩頭，我投訴咗好多次，但係一啲都冇改善！」
無障礙設施關注組發言人梁球認為，食環署既為視障人士設置引路徑，便須確保使用者安全，「整條引路徑都係唔想啲失明人士迷失方向同埋撞到嘢，如果有咁多障礙物，咁整嚟做乜？」梁指食環署有責任經常巡查，確保引路徑暢通無阻。
食環署發言人證實四月下旬曾作突擊檢查，發現有檔戶在行人通道擺放物件造成阻塞，已即時提出檢控。過去六個月共提出二十三宗有關檢控。