政情：謝卓飛租樓心大心細
候任西九管理局行政總裁謝卓飛尋日會見傳媒，佢對西九文化區同管理局嘅各項發展，以至請人揀蟀，都有一套睇法，唯獨有一樣嘢令佢心大心細，就係揀選自己未來嘅香港居所。究竟係租係買，佢諮詢超過二十人，最後有成二十種意見，有人話喺香港住梗係要住港島區，亦有建議佢住西九附近
實自己寶貝誕生，搞到佢依家都未有決定。
問佢覺唔覺得香港樓價過高，謝卓飛就話佢以前住開嘅倫敦，都出名樓價貴，而且佢只打算喺香港租樓住，唔使擔心樓市起跌。謝卓飛只會一支公搬嚟香港，太太同兩個仔都會留喺英國，唔需要租太大地方，唯一要求係放得落部鋼琴，等佢可以彈琴減壓。
謝卓飛早前講過對粵劇戲曲全無認識，管理局就喺佢日前探訪演藝學院時，安排咗批學生表演粵劇，佢睇完之後有讚無彈，話粵劇同十八世紀嘅歐洲歌劇有幾分相似，百忙中佢又抽空同八和主席汪阿姐見過面，做足工夫補習兼補鑊。