政情：黃偉綸拍爛片攬上身
為宣傳政改方案，煲呔曾今日準備拉大隊落區派傳單，早前仲針對年輕一代，將兩條宣傳片擺上YouTube日播夜播，不過兩條片都畀網民鬧爆，話內容同政改九唔搭八，擺明似嘥錢多過宣傳。新聞處處長黃偉綸（Michael）尋日出席立法會主席嘅午宴時，主動問班議員對宣傳片嘅意見，結果畀班議員鬧爆，好似以跳舞嚟形容「還原基本步」嗰條宣傳片為例，大家都覺得女主角年紀太大，好似畀中年人睇咁，據聞Michael辯護話要襯番個男主角，先搵個較成熟女性。
Michael又護主心切，話兩條片都係新聞處自己度橋，同其他人無關；仲話條片由度橋到出街只用咗個幾星期，即係好匆忙咁話。
據聞Michael仲話之前仲諗咗個廣告，內容係四個人打麻雀，其中一個叫胡但無食到，最後就出句口號：「有胡唔食，罪大惡極！」寓意如果唔通過政改方案，就會成為千夫所指。不過因為怕市民投訴政府變相鼓吹賭博，最後無用到。可惜千揀萬揀，結果都係畀人鬧爆！