政情：愛徒臨別紅酒贈葉劉
匯賢智庫主席葉劉淑儀嘅愛徒、南區區議員陳岳鵬，最近過咗檔做月薪約七萬元嘅特首辦特別助理，陳岳鵬○六年畢業回港，協助恩師葉劉淑儀創立匯賢智庫。○七年佢以匯賢智庫成員身份首度參選區議會選舉就贏得議席，其後仲出任中央政策組非全職顧問等公職。今次佢過檔特首辦之後，將會辭去匯賢智庫政策發展總監一職。
為咗答謝葉太呢位恩師，陳岳鵬喺消息公布後，第一時間買咗支紅酒做禮物，加埋張謝詞寫到密麻麻嘅感謝卡親身送畀葉劉。陳岳鵬呢支紅酒雖然約一千蚊就買到，不過古語有云「物輕情意重」，葉劉話愛徒出咗嚟工作無幾耐，呢個價錢嘅禮物已經好貴，最緊要係睇見愛徒有好發展，由心笑出嚟嘅葉劉真係難掩喜悅，陳岳鵬仲答應遲吓請葉劉食謝師飯添。
