政情：煲呔曾記仇搵KK祭旗
煲呔曾出名小器兼記仇，唔信？睇吓尋日佢同一眾高官與立法會議員午宴嘅表現大家就明白。話說煲呔曾單挑公文袋黨魁余若薇，畀建制派議員鬧爆，建制派火爆浪子、工聯會王國興當然唔會放過佢，差在未捉實煲呔曾扭耳仔。作為執政者接受批評好應份，點知煲呔曾就每件小事都記在心底，尋日午宴同王國興黨友黃國健（ＫＫ）同枱，一坐低就寸寸貢問ＫＫ：「點呀？今日有冇鬧我呀？」ＫＫ即場澄清唔關佢事。
點知煲呔曾咬住唔放話：「總之就係你哋鬧得我好勁啦！」態度傲慢、毫無反思，真係畀人鬧得少！
何俊仁高達被寸矮仔
尋日席上仲有唔少笑料，因為煲呔曾邀請公文袋辯論而呷大醋嘅民主黨議員李永達（高達），咁啱坐喺煲呔曾隔籬，佢不停同煲呔曾講，應該考慮叫埋民主黨主席何俊仁去辯論。煲呔曾就敷衍話，已經喺網誌交代晒邀請余若薇嘅三項標準。點知同枱嘅立法會主席即刻幫口，話第一個標準係要有五呎九吋高，當堂寸爆本身唔高嘅鐵頭仁同高達；行政會議召集人梁振英又不甘後人加多句，話第二個條件係要着裙，即係暗示民主黨班 男士一定無機會啦！