中環出更：Tim霍謀對策防富士康事件
富士康深圳廠房發生員工連環跳樓事件，搞到大老闆郭台銘頭都大埋，港協暨奧委會主席霍震霆（Timothy）同埋身為「廠佬」嘅立法會議員方剛及梁君彥都有留意進展。喺南沙有公司嘅Tim霍即刻開高層會，檢討管理模式，實行「預防勝於治療」；方剛同梁君彥就異口同聲話，唔相信員工會為錢尋死。
Tim霍好留意近日搞到喺內地設廠嘅港商心慌慌嘅富士康事件。尋日喺香港會食完lunch出嚟，都同卓妮講佢哋嘅應對政策。Tim霍覺得今次係一件特別事件，雖然佢哋南沙聘請嘅員工無發生呢啲不幸事件，但公司高層都為呢件事開咗個會，檢討自己嘅管理情況。
廠佬唔信為恩恤金輕生
經常要周圍去嘅Tim霍，對於各地嘅經濟大局都有留意。佢話依家歐美經濟開始呆滯，中國就正值蓬勃期，又係世界工廠，全世界都到呢度生產，自然對勞工需求好大，員工嘅壓力相對大好多，所以僱主要想法子紓緩員工壓力，勞資要多啲溝通，睇吓點減壓。
方剛同梁君彥都係廠佬，喺內地都有設廠，但佢哋唔信員工會為咗恩恤金尋短見。
做開成衣嘅方剛，對於今次嘅事件，佢都不明所以，仲話富士康全國有成八十萬員工，要管理呢個大企業一啲都唔易，所以喺管理員工方面一定要多花心思，放啲心機，了解員工需要。佢仲自嘲廠房得三千幾個員工，拍馬都追唔上對方。
同樣開製衣廠嘅梁君彥都話，唔相信自尋短見嘅富士康員工為錢自殘，即使有，都唔會個個係咁喇，所以對有傳員工為恩恤金自殺，佢話可信性好低！
卓妮