中環出更：馮國綸周末帶隊微服巡舖

商場如戰場，做集團領導層絕不簡單，尤其從事零售業務就更加要親力親為，好似G2000服裝連鎖店老闆田北辰就經常落舖「辣更」，但原來平時低調嘅利豐集團董事總經理馮國綸（William），都有親自巡視集團業務嘅習慣。卓妮上周六路過中環國金商場ifc，就目睹William巡視集團旗下利邦控股有限公司經營嘅意大利CERRUTI 1881時裝店。
馮國綸對英國GIEVES & HAWKES情有獨鍾，早前全身該品牌衣着出席利豐股東會。 （余素月攝）
馮國綸對英國GIEVES & HAWKES情有獨鍾，早前全身該品牌衣着出席利豐股東會。 （余素月攝）

親自演繹代理品牌

當日William一身便服，成個放假look，與友人先去ifc一間數碼沖晒店，然後再行入CERRUTI 1881店舖。William入到店舖睇咗一陣西裝褸，其後店員向佢展示一件casual款外套，大家就服裝討論咗一陣後便離開，前後過程約十五分鐘，之後William就行去商場詢問處辦理停車場泊車事宜。卓妮上前同William打招呼，佢話周六放半晝，所以去行吓商場，順便巡視業務喎！

CERRUTI 1881品牌為利豐集團旗下利邦控股經營。
  • CERRUTI 1881品牌為利豐集團旗下利邦控股經營。

William同田北辰仲有個共通點，就係着番自己經營或代理嘅服裝品牌，自己做埋生招牌。早前利豐舉行股東會，卓妮就見William演繹旗下嘅英國老牌子GIEVES & HAWKES。佢話自己全身由西裝、恤衫到領呔都係呢個牌子，仲好大方揭開件西裝褸裏面個招牌畀卓妮睇，大家明白點解佢哋經營嘅品牌可以做得咁成功啦！

受到William青睞嘅GIEVES & HAWKES絕非泛泛之輩，該品牌一向以度身訂造頂級紳士服聞名於世，喺英國超過二百年歷史，唔少歐洲皇室成員都係捧場客。喺William嘅哥哥、利豐集團主席馮國經帶領下，利豐五年前透過連串收購將GIEVES & HAWKES零售業務納入麾下，現與CERRUTI 1881、D'URBAN、KENT & CURWEN等品牌同屬於上市公司利邦控股旗下，緊貼潮流。

馮國綸（右）身穿便服，與友人一起巡視業務。（徐家浩攝）
  • 馮國綸（右）身穿便服，與友人一起巡視業務。（徐家浩攝）
馮國綸（左）一邊巡舖，一邊與同行男子交談。
  • 馮國綸（左）一邊巡舖，一邊與同行男子交談。
馮國綸（白衫者）巡舖後，行到詢問處辦理泊車事宜，同行者則在對開等候。
  • 馮國綸（白衫者）巡舖後，行到詢問處辦理泊車事宜，同行者則在對開等候。

卓妮