政情：林煥光忘我批強積金
乜嘢叫做忘我境界呢？睇睇上任只有半年嘅平機會主席林煥光（WK）就知道，事關佢好似忘記晒以前做過嘅事，瞄準政府一再發炮。曾經做過公務員事務局局長嘅WK，繼日前批評公務員入職要高中英文水平過於苛刻後，尋日又狠批強積金不足以應付退休生活，當年佢做署理教育及人力統籌司時，推銷老年退休金計劃失敗，之後政府才推出強積金制度，早前WK憶述呢段往事嘅時候，都批評當年上司壓下來，佢要好似推銷保險咁推動老年退休金計劃，搞到最後失敗收場。
WK尋日喺香港退休計劃協會午餐會上話，就公開批評強積金計劃只勉強為退休提供最低限度保障，甚至不足以應付退休生活，尤其係中年、老年及低收入人士，主要因為僱主及僱員嘅供款數目太少，而強積金管理費等收費又偏高。WK仲呼籲政府檢討強積金計劃，認真研究有冇其他退休保障嘅選擇。WK上任平機會後不斷炮轟政府，睇嚟當年佢為緋聞毅然辭職離開官場，都係正確選擇。