政情：大輝唔認C18係「親生仔」
尋日我哋披露立法會廠商會代表林大輝秘密搞社區聯盟「Ｃ18」，大輝尋日返立法會開會時，一見到我哋就笑到四萬咁口，不過一提起Ｃ18就話無嘢可以評論，仲講笑咁話本報知得仲詳盡過佢喎，變相默認咗有Ｃ18嘅存在，不過佢唔認自己係Ｃ18召集人，話充其量只係「參與得多啲嘅人」喎！
大輝雖然默認有份搞Ｃ18，但至於組織名會唔會改、幾時正式宣布成立等問題，佢全部唔肯答，仲話依家「十畫都未有一撇」，時機成熟自然同大家講。不過據我哋所知，Ｃ18喺去年中已經開始籌備工作，又點會未夠成熟呢？大輝見避唔到，就即時轉口風話十畫都有大畫、細畫之分，不過依家到底欠邊筆呢？佢始終唔肯講。
搞咁樣一個社區聯盟，好可能為未來進軍區議會、立法會甚至行政長官選舉鋪路，對於咁敏感問題，大輝笑笑口話，大家諗多咗，冇承認亦冇否認，但就話一班朋友聚埋係為開心，唔係為其他嘢喎！