政情：促成破冰梁愛詩做媒？

白鴿黨同中聯辦副主任李剛日前舉行「破冰」會面後，自爆今年三月接獲一名受中央委託嘅中間人通知，話中央好關注該黨政改立場，教埋佢哋正式寫信畀中央，詳述有關立場，提出會面要求。之前已聽聞呢位中間人係根正苗紅嘅重量級建制派人士，喺內地人脈甚廣，深得中央信任，仲好熟悉香港政改，有能力將泛民意見同訴求直達中央。
詩姐攞住數碼相機，去曬相舖曬相。 （陳嘉順攝）
詩姐攞住數碼相機，去曬相舖曬相。 （陳嘉順攝）

近日八到，呢位根正苗紅嘅中間人，正係基本法委員會副主任梁愛詩。須知全國人大常委會副秘書長喬曉陽同時身兼基委會主任，兩人成日開會見面，搵詩姐做中間人就實冇甩拖喇！

傳為白鴿黨扯線

尋日我哋下晝喺中環置地廣場撞到詩姐，見佢行到鄰近嘅太子大廈二樓一間曬相舖，然後一手一腳入記憶卡揀相曬，畀埋錢同攞番一疊之前曬落嘅相，前後大約五分鐘搞掂，證明年紀大唔一定係IT盲。

原來詩姐啱啱去完上海世博，想盡快曬番啲相。對外界盛傳佢係中聯辦同白鴿黨嘅中間人，詩姐笑謂：「傳就由得人傳喇，無乜所謂！」冇承認亦冇否認。至於雙方最後能否達成共識，佢直言：「我點知吖，我又冇去開會。」之後隨即離開，仲用疊啱啱曬嘅相遮住塊面，唔肯上鏡。咁又係嘅，做中間人切忌暴露身份同公開講太多，詩姐咁低調，完全可以理解！

  • 放大圖片
詩姐由入記憶卡、揀相、曬相全部一腳踢，證明年紀大唔一定係IT盲。
  • 詩姐由入記憶卡、揀相、曬相全部一腳踢，證明年紀大唔一定係IT盲。