政情：煲呔曾抬十字架擋箭

煲呔曾呢篇網誌題為「一切始於2005年……」，由當年十二月廿一日立法會否決政改方案講起，一直講到解釋最近點解單挑余若薇，承認呢個舉措一石擊起千重浪，「社會出現唔少陰謀論、分化論、無間道論」。其實，陰謀、分化，煲呔曾言重嘞，至於無間道呢個講法，煲呔曾就要捫心自問嘞。大家唔信，睇吓佢點樣為揀選余若薇解畫就知。

明踩暗捧對手

煲呔曾話，選擇余若薇作單挑對象，全因余係反對政改方案嘅議員中最決絕嘅一分子；同時眾所周知，余身為資深大律師，善於清晰表達己見；仲有，余亦擁有一定嘅支持者。咁講法，咪即係兜個圈捧多余若薇一次？煲呔曾究竟真係咁政治白癡，定係無間道，自己心中有數啦。

煲呔曾被質疑吃裏扒外，暗扶民主派，表面證供成立，令佢身上嘅港英餘孽「原罪」更加深重，可能佢怕一旦遭中央怪罪落嚟，非同小可，於是喺網誌上處處流露心急為自己開脫嘅窘迫心情，試圖「聖潔化」今次自把自為單挑余若薇嘅「壯舉」。佢引用聖經嘅語句：「心裏潔淨的人是有福的。」仲話只要心清意誠，再多風雨，都可以做到宋朝文豪蘇軾詞中「一簑煙雨任平生」嘅境界，又話實現市民嘅普選願望，係佢作為特首嘅使命，係佢「天天背負的十字架」咁話。

蘇軾晚年被貶謫惠州，煲呔曾會唔會被罷官，大家留待時間考證，我哋唔想揣測，只願煲呔曾真係心裏潔淨，唔好玷污十字架嘅聖潔就好嘞，哈利路亞！

諷刺嘅係，煲呔曾搵十字架作擋箭牌，但尋日就有天主教及基督教團體，包括香港天主教正義和平委員會、香港天主教勞工事務委員會、香港基督徒學會等組織，佢哋發表聯合聲明，批評煲呔曾喺補選唔投票，帶頭破壞選舉法治。煲呔曾今次四面楚歌，睇嚟佢要自求多福囉！