中環耳目：娶老婆豪飲干邑葉澍堃回味
港人近年熱捧紅酒，但講到飲干邑，內地人比港人更豪。近日呢股豪氣吹到香港，「人頭馬1898特優香檳干邑」繼登陸內地後，前晚宣布，香港都有得賣嘞。「食神」葉澍堃（Stephen）同「鮑魚之父」楊貫一（一哥）第一時間去試酒，Stephen自爆當年擺酒娶老婆，開咗近四十支人頭馬干邑。
新酒發布會前晚喺「一哥」尖沙咀阿一海景飯店舉行，人頭馬老闆筵開八圍，請「一哥」發辦煮魚翅、三十頭吉品鮑及遼參款客，貴賓一邊擦鮑參翅肚，一邊品嘗呢支以1898年配方釀製而成嘅香醇干邑，食到舔舔脷。
Stephen笑言近年身子要緊，飲紅酒多過干邑，印象最深係當年同太太Nancy結婚時，一口氣開咗近四十支干邑，當年每支賣百幾蚊，眨吓眼，如今一支「人頭馬1898」，叫價要二千幾蚊嘞。
「一哥」都鍾意飲干邑，仲教路話煎東星斑或雞髀時加幾滴干邑，鮮味提升百倍。
卓妮