中環出更：鄧鉅明有賢內助做生招牌
一個稱職嘅賢內助，當然係老公嘅好幫手。太子珠寶鐘錶主席鄧鉅明太太鄧宣宏雁，每次出現都會幫老公做生招牌，介紹最新靚錶，幫太子珠寶省招牌。尋日鄧太孖住老公鄧鉅明，仲有姑奶朱鄧麗萍及其老公朱繼陶，一齊出席「太子珠寶鐘錶精英盃」記者會，鄧太左手閃令令嘅鑽錶，好難唔成為焦點。
所謂「春江水暖鴨先知」，鄧太同老公品味一致，大家都係卡地亞fans，佢手上呢隻卡地亞出咗個零兩個月，所以鄧太呢個御用生招牌，亦都戴咗隻錶個幾兩個月，隻錶依家巿值廿萬左右，不過要買都唔係咁易，事關隻錶已經斷晒巿。
歐洲市場波動，鄧鉅明話對佢哋生意影響唔算大，大概都係十個巴仙上落，呢個都係正常波幅，比起當年沙士疫症同○八年金融海嘯所帶來嘅影響，相對細好多。不過，身為太子珠寶執行董事嘅朱繼陶話，今年佢哋太子珠寶嘅生意，比起○九年同期已經好番百分之四十左右，同○八年同期差唔多，睇番鄧太手上嘅名錶差唔多日日新款就係最佳證明啦！
講番個盃賽，太子珠寶鐘錶將會連續三年贊助盃賽，下個月十六日嘅賽馬日將會係首屆賽事，獎金高達二百三十萬元，到時仲會有腕錶珠寶時裝表演，夠晒熱鬧！
卓妮