中環出更：四叔天價買地嘗住別墅滋味
十八億投山頂地王白加道三十五號，恒基四叔李兆基豪氣再現！四叔更熱心栽培後輩，尋日以培華教育基金會主席身份，宴請幾位獎學金得主齊齊食晏，投得靚地嘅佢心情勁靚，有問必答，四叔解開以天價買地建獨立屋之謎，原來非為風水，而係想「人有我有」喎！
四叔叫食飯，基金會內幾位富豪成員齊齊響應，包括培華常務委員會主席兼中總榮譽會長霍震寰、「福布斯」富豪方潤華及囝囝方文雄。超級富豪難得聚首一堂，傾乜呢？原來係天下事！
方潤華一坐低就講歐洲債務危機。佢話歐洲各國實力參差，用埋同一種貨幣，歐元前景幾難搞。四叔同霍震寰就擔心南北韓對峙會否升溫，各人你一言，我一語，字字珠璣，十足上緊一堂國際關係課。梗係喇！外圍局勢同富豪嘅荷包息息相關，
少一眼，隨時唔見錢。
傳風水正旺男丁
難怪四叔慨嘆，如今身處波動市，想搵錢做善事都唔係咁易嘞，不過佢買地就唔手軟，仲逆市以天價投山頂地建豪宅。問佢點解咁豪氣，四叔就快人快語話：「我一向住多層大廈，別墅未曾住過，人有我有，住吓咁解囉。」答得認真風趣！有傳呢塊地大旺男丁，風水正，四叔就不置可否，箇中奧妙，睇怕佢最清楚嘞。
市況波動如坐過山車，方潤華都為股市把吓脈。佢話港股跌至萬八點左右應該暫時喘定，係咪入市，各位自己決定。佢公子方文雄就話唔會睇淡樓市，反而密切留意筍盤，遇上位置極佳、價錢合理嘅商舖或商廈，一定會果斷入市，唔會錯失良機。
講番培華基金，唔經唔覺已經成立廿八年，四叔笑言做善事同做生意一樣，要有增長效益，多年來合共資助及協辦五百多個教育項目，受益人士多逾萬六人。培華仲設立獎學金，鼓勵考上內地重點大學嘅香港中學生，北上認識國情。尋日有幾位清華生學成歸來，不忘拉住四叔影番張相。
卓妮