政情：白鴿黨執正見李剛
民主黨創黨十六年首次會見中央官員，前日三位立法會議員何俊仁、劉慧卿同埋張文光締造歷史，受邀同中聯辦副主任李剛會面。為咗出席呢個場合，白鴿黨三人都特別穿戴整齊，但係鐵頭仁同劉慧卿雙雙否認有刻意打扮過，劉慧卿更加笑笑口話「扮你個頭」，都係張文光老實啲。
張文光尋日話，佢已經成年無打呔，但因為鐵頭仁喺會面前提醒佢要執正啲，同埋記得要打領呔，所以佢全部照辦，至於套西裝就無話特別揀嘅，事關佢最靚嗰套西裝係喺囡囡畢業禮先着，佢驚如果着出嚟會嚇親人，所以都係平實啲好。
至於平時將個頭蠟到散晒嘅鐵頭仁，前日就將頭髮gel得貼貼服服，佢話早前飛咗髮，不過並非為咗見官，身上着嗰套係「爛鬼」西裝，瞓街都係佢喎。
至於劉慧卿，日常多數着套裝，而且選用好鮮嘅顏色嚟配合硬朗作風，但係前日佢着咗杏色外套加長裙，睇起上嚟溫柔好多，不過佢話條裙已經買咗十幾年，問佢係咪特別着裙，佢話「發你個夢」，問佢係咪特別打扮過，佢就話「扮你個頭」喎！