政情：金刀梁高帽笠中大
中文大學醫學院院長霍泰輝同行會成員梁智鴻分別係兒科同泌尿外科先驅，尋日老朋友碰面，互笠高帽，兩位杏林高手仲百無禁忌，搵自己嚟開玩笑。
金刀梁尋日參觀中大喺威爾斯醫院嘅微創手術培訓中心，講笑話要報名學吓點樣用機械臂同病人切前列腺癌，但又驚中大嫌佢老，會唔收佢學嘢。霍泰輝見金刀梁咁支持，猛讚佢係前列腺癌先驅，唔單止以中大名義送咗把小銀刀畀佢留念，仲話第時年紀大咗有機會做手術，都會第一時間諗起金刀梁。
金刀梁就成日搵自己年過七旬來開玩笑，尋日有唔少接受機械臂切前列腺癌嘅康復者分享感受，金刀梁問候兩位患者做完手術仲有冇漏尿後遺症，兩位同佢一樣七十幾歲嘅長者都話，做完開頭就有，依家冇咩點漏尿嘞。點知金刀梁突然勁風趣咁話，「你哋做完手術都係漏一、兩滴，我冇做手術都漏一、兩滴喎！」為咗要證明中大做手術做得好好，不惜連自己都擺上枱，金刀梁你係得嘅！