煲呔曾約余若薇辯論，政壇揶揄居多。建制派議員前晚同煲呔曾嘅飯局，嗰場辯論成為大家七嘴八舌嘅焦點，綜合大家睇法，議員認為煲呔曾身高輸蝕、又唔可以賣感性，而且一激就發脾氣，所以大家幾乎睇死煲呔曾呢鋪係攞嚟衰！
據議員引述，飯局之上，唔少建制派議員都化身諍友，有啲都唔介意做師爺，話畀煲呔曾知佢嘅缺點，譬如叫佢唔好發脾氣，但又要適時表露真性情，等電視機前面嘅人感受到佢嘅真誠。
不過，做過高官又讀過政治嘅葉劉淑儀就話，煲呔曾呢一戰真係好輸蝕，仲以「高風險、低回報」嚟形容，事關煲呔曾身高唔及對手，而且男女辯論，男方如果詞鋒太銳利，可能畀人話冇風度，而且男人對女人，扮感性都受到限制，事關聲淚俱下從來係女人嘅專利。加上煲呔曾中文表達能力唔夠好，如果有個英文環節，對煲呔曾可能係好事。
有政圈資深大狀話，余若薇最叻就係喺法庭上笑笑口殺你一個措手不及，好多詞鋒銳利嘅大狀都招架不住。電視上笑面虎對黑面神，勝負好易分啫。