政情：葉澍堃乒乓心得傳授IT豪
前經濟發展及勞工局局長葉澍堃（Stephen）離開政壇做咗食家，不過佢熟練嘅政治技巧竟然喺乒乓波較技時都用得着，「五散人」譚偉豪（IT豪）畀佢點醒，仲贏埋波添。同場仲有鏞記老闆甘健成。
早前佢哋喺馬會會所較技，連埋波腳盧俊榮一共四人，先打雙打熱身，大家來回搓波近半個鐘就轉打單打。學咗乒乓波一年嘅Stephen掌握咗好多乒乓技術，至於IT豪原來已經好多年冇打，不過平時做開運動嘅佢，喺Stephen提點下，好快就打出水準，連甘老闆都讚佢唔使蹲低個人已經拉得個波好靚。
「唔失波就會得分」
IT豪同甘老闆對決打六分四，甘老闆連贏五分之後，坐喺旁邊睇波嘅Stephen即時醒咗個心法畀IT豪︰「唔出聲就民望高，唔失波就會得分。」可能IT豪係政治人，對Stephen心得即時有所領悟，慢慢睇準先接甘老闆嘅波，結果喺唔失波下連追五分，要打刁時，最後攞多一分反敗為勝。雖然今次第一次交手，不過Stephen大讚IT豪唔止係好腳，仲學嘢夠快添。