政情：大輝籌組C18左右政局

「Ｃ18」地區聯盟在去年中開始醞釀，「Ｃ」代表Community（社區），「18」代表十八區。身兼沙田委任區議員嘅大輝以沙田區作為根據地，先拉攏區內議員加入，形成聯盟雛形後，再到十八區展開「招募」行動。聯盟發展至今已增加至三十多人，成員分別來自政黨或獨立議員，涵蓋過半數區議會，大部分為專業人士，好似沙田區就有身兼藥劑師嘅新論壇龐愛蘭、身兼小學校長嘅獨立議員湯寶珍等。

面對政改進可攻退可守

聯盟喺灣仔一間私人會所每月開一次會議，討論當前社會熱門議題，中聯辦官員同唔少司局長都出席撐場，包括政制及內地事務局局長林瑞麟、運輸及房屋局局長鄭汝樺、財經事務及庫務局局長陳家強、勞工及福利局局長張建宗等。至於大輝喺立法會嘅「五散人」老友，就擔任顧問出謀獻策。據聞普遍官員認同「Ｃ18」成立，更表示希望往後可以保持聯繫及交流。聯盟舉行例會之外又定期搞培訓班及到內地及海外考察等。

「Ｃ18」成立目的，開宗明義係就社會上重大議題在地區收集民情，集思廣益後向政府提交建議，同時展示實力。不過，面對政改方案可能增加六席由區議會間選入立法會嘅議席，加上二○一二年特首選舉，不難令人聯想「Ｃ18」成立，進可攻、退可守。

有聯盟成員透露，大輝已放低所有生意，專心搞政治及籌組聯盟，並已覓得觀塘開源道一座工商業大廈嘅單位作為聯盟總部，據聞大輝會喺六月下旬正式將聯盟公諸於世，佢喺過去幾個月喺度秘製啲乜東東，到時自有分曉。