中環耳目:鄧長政難忘NOBU石蝦天婦羅

國際青年商會香港總會會長鄧長政(Gene)日日都好頻撲,冇辦法啦,做得青商會首領就預咗時刻同時間賽跑,事關佢哋喺香港有十九個分會,每年舉辦嘅活動加埋多達三、四百個,有時佢一日要趕不下十個活動,少啲體力都唔得。

早前卓妮喺青商會六十周年酒會見到Gene,問佢至愛食肆,佢笑謂近排成日捱飯盒,好耐冇享受美食嘞!Gene卒之都諗起至愛嘅日本餐廳NOBU,對佢哋嘅石蝦天婦羅配香辣忌廉醬十分難忘。

荷里活明星追捧

NOBU位於尖沙咀洲際酒店,四年前打入香港時曾引起飲食界騷動,事關佢哋創辦人松久信幸(Nobu Matsuhisa)係國際重量級大廚,廿幾年前曾經喺洛杉磯開餐廳,由於手藝了得深受荷里活明星追捧。

後來羅拔狄尼路試過佢親自炮製嘅西京燒銀鱈魚後驚為天人,力邀佢一齊開設NOBU。

NOBU喺全球有近廿間餐廳,捧場客粒粒巨星,有美國前總統克林頓、知名導演史提芬史匹堡、麥當娜、周潤發等。