中環出更：姚君達愛Patek Philippe有二手市場

見慣名牌嘅米蘭站主席姚君達（Byron），裝身絕不求其。平日愛穿日本牌子COMME des GARCONS西裝，貪佢剪裁貼身，腰位修身，西褲又夠貼腳，不知幾咁潮，突破一貫生意人着西裝要着歐洲牌子嘅傳統，不過講到揀錶，佢都係鍾情響噹噹嘅瑞士牌子Patek Philippe。

Byron早前出席仁濟董事局就職禮，手上戴咗一隻價值逾三十萬元嘅Patek Philippe。隻錶賣點係有齊多個大城市嘅時間，包括日本、倫敦、杜拜、巴黎、紐約及三藩市等，反映佢嘅視野幾咁全球化。

姚君達將二手貨發揚光大，佢用九年時間，將米蘭站由一間小店發展至依家有十間分店，卓妮問佢何解鍾情Patek Philippe，Byron三句不離老本行：「最緊要有二手市場！」不過，隻錶喺金融海嘯後跌價至廿多萬，Byron話唔介意，始終名牌有價喎。