中環出更：蔡李惠莉買鞋扮靚迎夏日

蔡太着衫一向有潮流觸覺，除咗搵裁縫訂造高貴晚裝，平日買衫離不開名店。

卓妮前日晏晝四點幾行經置地廣場，撞到蔡太獨自逛街。佢向來鍾情閃令令顏色，呢日抽住一個金色手袋配金色高跟鞋，一個箭步走入Miu Miu睇鞋。眼前花多眼亂，蔡太揀咗幾款心水，細心地喺鏡前逐一比較。

蔡太喺Miu Miu店睇鞋。

Miu Miu白色交叉帶高跟鞋以羊皮製造，着上腳超舒服。

邊講電話邊揀貨

呢個時候，手提電話響起，唔知係咪乖孫女打嚟，蔡太唔單止冇匆匆掛線，反而愈講愈興奮，試鞋期間照樣傾，實行一心二用。揀咗半粒鐘，一於扑錘買咗對白色交叉帶高跟鞋，店員話，呢款鞋年頭時曾經出過啡、灰兩色，近月再推出白色羊仔皮，一睇就知啱晒夏日feel，羊皮質料梗係超舒適。對鞋盛惠四千八百蚊，蔡太碌卡畀錢。

Miu Miu設計風格活潑不失貴氣，係名太置裝首選。

掃完貨後，司機馬上駛架賓利座駕接蔡太返歸。 （陳嘉順攝）

掃完鞋後，蔡太意猶未盡，轉戰Gucci，點知電話又響起，蔡太果然係大忙人，惟有揸住電話睇衫。可惜兜咗一個圈都係冇心水，最後登上黑色賓利（Bentley）豪華座駕返屋企食晚飯。

Miu Miu係Prada嘅副線，深得名媛淑女捧場，主打少女路線，將年輕少女塑造成公主般可愛，風格活潑佻脫又不失高貴，連名太也傾心。新貨一出就成為潮流指標，Miu Miu同Prada出品嘅platform鞋，更係必買搶手貨。