政情：林煥光數唔出港府驕傲事
香港回歸咗呢十三年嚟經歷過唔少風雨，值得大家驕傲嘅事相信都唔少，不過有幾多同特區政府有關呢？平等機會委員會主席林煥光（WK）尋日出席由香港公民教育基金會舉辦嘅「我的香港夢音樂會」時，如數家珍咁大談值得港人驕傲嘅事，但數來數去，竟然無一件同特區政府有關喎！
WK向在場數百觀眾話，六十年代成百萬人喺港人無準備嘅情況下嚟香港追尋自由，七十年代前港督麥理浩頂住當時短視嘅官員同埋社會壓力，興建公屋、搞勞工保障兼建設沿用至今嘅社會福利制度，八十年代港英政府又頂住反對聲音，畀十萬計越南船民來港，九十年代不少港人喺香港前途未卜嘅情況下留港建港，到二○○三年沙士襲港，醫護人員都奮不顧身咁服務市民，呢啲都係WK認為值得驕傲嘅事。
數來數去，呢位前特首辦主任都冇提到回歸之後，特區政府做過乜嘢值得驕傲嘅事，即係話特區政府回歸以來，都係乏善足陳囉。