民主黨創黨主席李柱銘早有「李漢奸」同「現代吳三桂」稱號，近年每到關鍵時刻，必明撐暗扶公民黨而狂踩民主黨，所以又叫「香港李登輝」。煲呔曾單挑公民黨黨魁余若薇辯論政改，明落民主黨面，激到白鴿黨上下咬牙切齒，但係「香港李登輝」尋日話，畀佢揀都只揀余若薇，唔揀民主黨主席何俊仁，再次公開「賣黨」。
煲呔曾同泛民辯論政改方案，民主黨作為民主派內最大山頭，竟然無份參與，可謂奇恥大辱，所以，曾經公開講話李柱銘唔識政治嘅「華叔」司徒華尋日篤爆煲呔曾玩分化。不過，出席同一場合嘅李柱銘，態度截然不同，話煲呔曾無問題，換轉係佢，首選都揀余若薇，又指鐵頭仁就政改同港府溝通緊，根本唔適宜參加辯論。「香港李登輝」再次手指拗出唔拗入。
「香港李登輝」賣黨，早有前科，包括兩度出賣黨員甘乃威，將立法會港島補選機會拱手交外人，一手造就公民黨壯大，令民主黨沒落，同李登輝當年卸任總統後，明幫暗助國民黨競選對手民進黨陳水扁，手法如出一轍。