政情：立會夜冷貨明益自己友
每逢立法會換屆嘅時候，班議員都會將用公帑買嘅物資還番畀秘書處，留畀新一屆嘅議員用二手價買番。五名辭職再選嘅議員做咗唔夠兩年就劈炮，所以佢哋先前交番出嚟嘅「夜冷貨」有唔少都好新淨，有部分都幾抵買。
立法會早兩日出文件通知議員，話有成百件二手電腦設備、手提電話、辦公室設備同家具可供選購。我哋細心睇過份清單，發現最抵係黑色16GB iPhone 3GS，街價賣緊五千三百八，呢部電話就算二手都不斷升值，今次二手價五千蚊就有交易。
其他筍貨仲有名廠三十二吋液晶體電視機，只係用咗半年多啲，由原價近五千四減至四千八；近年開始多人用嘅蘋果手提電腦MacBook Pro，一樣只係用咗半年多啲，原價近一萬三千二，二手價萬二蚊。
不過好可惜，呢啲物資係議員優先選購，即是普羅市民冇份。至於想買嘅議員就要本月廿八日前回覆秘書處，多過一位議員想買同一件貨就抽籤決定，抽籤結果會喺下月一日公布。