政情：中環靚地無人認頭

立法會大樓與皇后像廣場之間通道平日寧靜閒逸，但自高鐵撥款一役，竟變成是非之地，當日反高鐵大聯盟同一班八十後青年，就喺呢段約五米闊石屎路上搭司令台、豎大螢幕同圍攻立法會，最終釀成警民衝突。政改方案預期六月二十三日表決，民主派部署再圍立法會，該通道嘅保安問題，刻不容緩。不過，最基本嘅土地管理權問題，仍然糾纏不清。

拋歷史逼立會認命

立法會行管會前日開會，跟進通道管理權誰屬問題，據悉，行政署畀立法會嘅回覆，堅持若立法會當日有會議舉行，該路段就由立法會負責管理，周末同公眾假期先至由政府接手。政府仲同立法會講歷史，話呢個做法，由八五年高等法院變身立法局大樓已經開始，即係叫立法會認命，孭番開會期間該通道嘅管理工作。

不過，議員唔係省油的燈，點到你政府話點就點，行管會成員七嘴八舌，話土地管理權問題，唔係政府說了算，無原始文件作證，點證明係立法會嘅責任先？況且，立法會無槍無炮點管呀？

一旦再發生類似反高鐵圍立會事件，唔通派秘書處職員出去拉人封艇咩！所以，行管會決定，將憂慮通知行政署，希望行政署自己識做，主動接番條路嘅管理權。

我哋問行管會成員黃定光，佢直言，管理公眾地方涉及消防、建築、衞生同治安一大堆專業知識，政府叫立法會負責管理行人通道，咪盞嘥氣！聽大象哥嘅語氣，睇嚟政府推波畀立法會嘅如意算盤好難打得響囉，咁又係嘅，上次班八十後喺通道搭台作戰，總算大步檻過，無流血收場，但係下次會發生乜嘢事，邊個知呀？立法會是非已經夠多，門外呢塊是非之地，都係少理為妙！