中環出更：龔仁心：會積極買地
正式接管咗華懋嘅華懋集團執行董事兼管治委員會主席龔仁心，呢幾個月動作多多，上星期白加道卅五號Falconridge嘅私人拍賣會，龔醫生仲以十五點五億元率先承第一口價，成為焦點。到拍賣官宣布成交，佢又上前同買家恒基地產副主席李家誠握手恭賀，搞到大家都以為華懋同恒地合作投地。雖然最後李家誠表明，呢個項目將會係家族自用，但係呢件事都講明龔家已經開行馬力「做嘢」。
尋日龔醫生同太太一齊去亞洲國際博覽館出席一個藝術古董展覽嘅開幕禮，龔醫生話自己唔識古董，不過一講到做生意，佢就笑笑口。龔醫生話嚟緊華懋會積極買地，好似粉嶺嘅地皮佢哋都好有興趣，龔醫生仲漏晒口風話佢哋做地產，無地點得?!睇嚟嚟緊嘅投地活動，應該都會不時見到佢嘅蹤影。
睇表演摸獅頭
喺尋日開幕禮上表演嘅南獅特登走去龔醫生夫妻面前獻技，不知幾咁乖巧，氹得佢哋都忍唔住摸摸獅頭。龔醫生個仔上年小登科，問佢想唔想今年抱番隻老虎仔，佢就搞笑話自己已經有個仔啦。
卓妮